الأحوال الجوية المتقلبة اللي شهدتها المنطقة اليومين اللي فاتوا من امطار الشديدة مع برق و رعد و اللي بالذات تعتبر حدث استثنائي على المناطق الجافة و دول الخليج؛ غالبًا بتتشاف كعائق قصاد سير الحياة بشكل طبيعي بالذات على الدول اللي ده نادر فيها و بالتالي بنيتها التحتية مش مستعدة لاستقباله ؛ الطقس ده بيخلي الشغل يتعطل، الطرق تغرق بسبب المياه المتجمعة، وحتى إنتاج الطاقة الشمسية بيقل أحيانًا بشكل كبير بسبب حجب أشعة الشمس اللي ممكن يوصل لـ 90%.
لكن وسط حالة الشلل المؤقت دي، في زاوية تانية تمامًا لو بصّينا لها: الجو ده مش مجرد مشكلة… ده مورد، وكمان مورد قيم جدًا.
المطر الغزير في حد ذاته مصدر مياه مهم وغني. لدرجة إن في دول صحراوية بتلجأ لتقنيات زي تلقيح السحب علشان تُحفّز سقوط المطر صناعيًا، لأنها شايفة فيه فرصة حقيقية لتأمين مصدر مياه مستدام. ولو بصّينا على استغلال المطر، هنلاقي إن الموضوع مش بالضرورة محتاج بنية تحتية معقدة أو تكلفة ضخمة؛ أحيانًا أنظمة بسيطة على أسطح البيوت مع وسائل فلترة أساسية تقدر تحقق استفادة كبيرة جدًا.
وحتى في نقطة الطاقة الشمسية، اللي ظاهرها إنها بتتضرر من غياب الشمس، المطر في المقابل بيلعب دور مهم جدًا: تنظيف الألواح من الأتربة المتراكمة، واللي أحيانًا بتفضل مهملة لشهور. النتيجة؟ كفاءة أعلى وإنتاج طاقة أفضل بمجرد ما الشمس ترجع.
في النهاية، المطر مش بس ظرف صعب بنحاول نتجاوزه… هو نعمة من ربنا، ومع شوية وعي في التعامل معاه، ممكن يتحول من عبء مؤقت إلى فرصة حقيقية نخرج منها كسبانين.
المطر من تحدي يومي الى مورد مستدام
